土瓜灣&啟德一帶の模型店
80-90年代，曾經係嘅超級G.Kit模型集中地嘅 - 旺角，近年隨着港人移民潮開始，結業潮氣勢凌厲，差不多旺角所有嘅模型舖都執晒，只係剩低千里達，及皆旺商場樓上21/F嘅美術店，基本上旺角已經接近完全冇晒有質量嘅模型店舖，香港市面去到呢一步，零售都可以話係注定滅亡，因為，連新一代小朋友都買唔到有質量嘅玩具，其成長一定坎坷「細路仔冇好嘢玩，大個咗都唔方醒目得去邊」，因為玩具本身，就係青少年成長嘅Training exercise。
因此，近日遊走土瓜灣及啟德一帶，搜尋剩低未結業嘅模型舖，叫做有啲斬獲，我喺度分享一下。
啟德附近 - 田宮模型 (Tamiya) 旗艦店
位於啟德SNDO雙子匯2期6/F 601-602號舖，鄰近啟德MTR西鐵站，好容易去，上到去6/F，地方寬敞，仲以為去咗日本，裝修豪華，非常整潔，但我個人一行入去，覺得似係一間「模型盒showroom」多個係模型舖，當然放咗少量Tamiya生產嘅模型，分為遙控、普通模型、及四驅車場。由於面積相對較大，所擺賣嘅貨架及貨品種類，顯得比較細小規模及冷清，而且模型用品並不齊全，如果係為咗上去睇吓Tamiya自己生產嘅模型「盒」，還可以，但去買模型嘅話，基本上除咗模型本身以外，大部份嘢都買唔到，例如Mr. Color油性油....，及所有有關Tamiya以外嘅物品。上到去唔好有太大期望，基本上1分鐘之內你會離開。其最失敗嘅地方，就係冇已經砌好嘅模型喺度沖撐場面，好明顯Tamiya嘅marketing部門，市場智慧有限，細路仔睇唔見模型誠品「有幾靚仔」，邊個會想買？
我對呢檔嘢嘅結論係: 「執笠係遲早嘅事🙏🏻」。
 |
| 田宮模型 - 啟德SNDO雙子匯旗艦店 (外觀一覽)。 |
 |
| 模型油好齊全，可惜，一般砌Bandai or G.kit(Resin)嘅人，較少選擇Tamiya嘅模型油。 |
 |
| 1/700嘅2次大戰戰艦都係有唔少，但竟然一隻都冇砌好擺出嚟沖撐一下場面，證實市場智慧有限。 |
 |
| 1/48 or 1/350軍事模型都有，只有其中一隻做Demo，可惜數量太少。 同昔日80-90年代嘅旺角環球模型相比，實在非常失色。 |
 |
| 遙控車有幾盒招呼吓朋友咁樣啦，但唔好期待買到任何補品。 |
啟德附近 - Kotobukiya（壽屋）旗艦店
日本模型大廠Kotobukiya亦係位於啟德SNDO雙子匯2期6/F, 跟田宮旗艦店係鄰居，地方一樣寬敞，仲豪華過田宮旗艦店，種類尚算齊全，喺佢哋網上見到嘅，基本上都有，但有少部份缺貨，例如我想去參觀已經推出咗幾個月嘅1/3000銀河英雄傳說自由行星同盟第13艦隊旗艦「Hyperion」，就連個盒都見唔到。可以理解為呢檔嘢嘅營運，都係是是但但，缺咗貨，亦唔識得補貨。收銀條女亦係死氣沉沉，同昔日嘅旺角宇宙船嘅員工，着晒圍裙四圍走，不斷補貨嗰種光景，實在有天淵之別。唔好以為呢檔嘢係旗艦店，就有日本秋葉原模型店嗰種氣氛，仲爭好遠好遠，大家唔好有太大期望。
我對呢檔嘢嘅結論係: 「執笠係遲早嘅事🙏🏻」。
 |
| Kotobukiya（壽屋）啟德旗艦店 (外觀一覽) |
 |
| 而家呢類俗稱叫做GK嘅人形公仔，基本上係Kotobukiya而家量產嘅一個主力生產線，本質上同我哋喺80-90年代見到嘅真正G.Kit日本動畫人形手板模型，喺細緻上，及顏色持久力上，係爭好遠。呢啲公仔，其實擺2-3年就會退色，用$1000幾百買咗，轉頭退咗顏色變成垃圾，喊都無謂。相反，真正嘅G.Kit (resin/garage kit)，由PU樹脂膠製成，如果係用郡氏(Mr. Color)油性模型油上色嘅話，即使擺20年，都唔會退色。所以，傻仔先至會買呢啲現成嘅所謂GK公仔 (GK一詞已被濫用化，原意其實只係指Resin/Garage Kit - PU樹脂膠模型)，隨着時間三、兩年過去，依一類被量產化嘅假GK模型，自動會變成一堆退咗色嘅PVC塑膠垃圾🙏🏻。 |
 |
| 地方寬敞㗎，去行吓冇所謂。 |
啟德附近 - GUNDAM Base Hong Kong 旗艦店
Bandai製GUNDAM模型+大會指定旗艦店，亦係位於啟德SNDO雙子匯2期8/F, 跟樓下嘅田宮旗艦店、Kotobukiya（壽屋）旗艦店係樓上樓下嘅街坊。
此店相對於樓下兩間日本模型旗艦店，氣氛明顯較熱鬧，不斷有人出入，而且門口有「巨型GUNDAM」，亦吸引唔少小朋友嘅眼球及成年人拍照留念。可惜，店內所有模型物品，我嘅興趣接近0。因為我係一個自80年代已經一嘢上到「頂峰要求」嘅真正G.Kit模型製作者，自然對一般Bandai ABS塑膠模型，完全睇唔上眼，不論造型、details、塑膠質量，係好難同傳統嘅Resin材料生產(G.Kit)嘅GUNDAM模型作出挑戰性比較，Bandai即使用咗30年時間，仍然追唔上傳統G.Kit首辦模型嘅造型質感，實在可悲。
當然，Bandai製嘅GUNDAM模型，我留意到有個別型號，係做得唔錯，例如係Exia、Strike、Buster等等，身材比例算係合格，但係有更大量嘅型號，係得啖笑，真係送俾我都唔要。如果閣下好似我咁，領教過80-90年代嘅Bandai製GUNDAM模型，我相信我嘅感官，大家會有共鳴 (送俾我都唔要)。
我對呢檔嘢嘅結論係: 「未必會執笠，靠一群兒童及初級水平模型人士支撐，會捱到落去🙏🏻，但對於Bandai其模型質量水平，明顯及唔上樓下嘅Tamiya (田官模型) 及Kotobukiya（壽屋），年紀過20歲嘅年青人，直接落樓下OK」。
 |
| GUNDAM Base Hong Kong Entrance (外觀一覽) |
 |
| Bandai生產質量，屬入門級，靠姿勢搭救，吸引消費者。 |
 |
| 以博物館嘅方式，列出過往生產過嘅GUNDAM，小朋友最愛👌。 |
土瓜灣附近 - DL Model (GUNDAM改造部件專門店)
相對於鄰近啟德大型商場嗰3檔日本國家級模型店，一味得嗰搞字，入門級味道甚重，冇乜嘢係實用。而呢一間位於土瓜灣嘅本地樓上鋪模型小店，相信係而家香港剩低唯一一間最專業嘅GUNDAM模型店。DL Model 位於土瓜灣土瓜灣道84號環凱廣場5/F 510-511室，距離土瓜灣MTR車站有少少吊腳，但去到店內購物，當你一行入該店舖，你會發覺值得去行一次。
由於旺角「有料到」嘅模型店已經執得九九十十 😫， 當一行入呢間店舖，發現佢賣嘅貨品，竟然有唔少都適合自己胃口，我喺好短嘅時間，就意識到搞呢間店舖嘅人，應該係一個好了解砌模型人士嘅需要嘅人，因為佢主要嘅貨品，基本上都係「食到正」一個專業GUNDAM模型用家嘅胃口，上邊可以買到嘅嘢，基本上你唔會係一間普通嘅香港模型舖買到，就係「GUNDAM改造部件」。數量之齊全，可以媲美個別淘寶店，而價錢只係比淘寶店貴2-5%左右，如果你怕上淘寶買錯嘢，你可以去呢間店舖睇到實物，包括一啲由3D Printer製成嘅改造部件，或一啲由Bandai MG、HG模型剩低嘅材料 (例如GUNDAM人仔、GUNDAM槍械、GUNDAM水印等等) ，都可以散買。如果在土瓜灣附近住，直頭連順豐運費都慳埋。其中，以GUNDAM水印及機械改造部件嘅數量最齊全，基本上大家口中噏得出嘅GUNDAM模型相關型號嘅水印，都搵得到，而且價錢通常喺$15-$20以內，非常抵玩。
我對呢檔嘢嘅結論係: 「有得搞，甚至乎可以當係香港GUNDAM改造模型嘅最集中文化遺產👍，大家可以理解為依一間模型店，係一間專賣GUNDAM補品嘅地方」。
 |
| DL Model (外觀一覽)，有日本秋葉原樓上舖嗰種feeling。 唯一欠嘅，就係掛上幾張動畫poster，咁樣仲似秋葉原。 |
 |
| 我買左幾樣心頭好，全部價錢唔會貴過淘寶好多，其中刀片，竟然只係HKD $10.... 😆👍。 其他改造部件: 包括適用於B-Club 1/220 GUNDAM系列嘅超迷你噴嘴，及用於GUNDAM Rifle Finder嘅「晶體嘢」，都好齊全。而家想以呢個Taobao價錢，喺香港門市買到呢啲模型補品，基本上接近冇可能。 |
