旺角宇宙船animate回歸 - 極失望
旺角宇宙船在80年代已經喺香港出現，係我年少時候嘅主要動漫、G.Kit崇拜及朝聖勝地，但隨着日本動畫水平進入2000年之後大幅下滑，基本上動畫相關連帶嘅產物，都變得質素參差，睇見都唔想買。旺角宇宙船嘅吸引力，亦大不如80年代至90年代，越做越細間，直至到疫情期間，最終結業。但自從2025年秋季，旺角宇宙船事隔五年，再次回歸，早幾日有時間，去參觀一下，新鋪位於旺角中心4樓，喺旺角地鐵站上蓋，好容易去得到。
一行到入去，發覺唔對路，整個裝修，及一眼看落去所販賣嘅物品，完全同八、九十年代嘅旺角宇宙船，有天淵之別，基本上我覺得而家佢哋只係一間秋葉原角落頭賣閃咭、漫畫書、襟章等等嘅舖頭，完全冇任何模型、G.Kit、和一啲特別嘅動漫貨物，整間舖頭感覺上好似完全冇靈魂，非常失望，只能夠講係今非昔比。
現時日本動畫嘅水平，實在係十分之差勁，創作故事嘅質素，簡直去到不知所謂，不睇也罷，間接令到日本動畫周邊嘅商業機構，都難以得到生存機會。
大家心目中最光輝嘅宇宙船，永遠只係停留喺「大家嘅80年代」，永遠都唔會再返嚟，光輝嘅嘢，一閃即逝，而家睇返嗰一刻嘅光芒，也許只能夠喺腦海中回味。
 |
| 旺角宇宙船回歸 |
 |
| 大不如前嘅旺角宇宙船，感覺似係秋葉原橫街嘅小店舖，只係販賣書籍，同一啲小襟章， 失去左高階產品，實在令人慨嘆 |